Vi føreslår at de tar utgangspunkt i skilnaden mellom det maksimale skattefrådraget ditt og det skattefrådraget som er brukt i den førebelse skatteutrekninga. Skatteprosenten på kapitalinntekt er 22 prosent. Deler du differansen på 22 og gongar med 100, får du den kapitalinntekta som gir skatt tilsvarande differansen. Vi rår dykk til å bruke skattekalkulatoren. Der kan de prøve dykk fram til de finn ei fordeling av kapitalinntektene som gjer at de får utnytta det maksimale skattefrådraget, om mogleg.

Har de ikkje nok kapitalinntekt til at den av dykk som har lågast inntekt, får utnytta det maksimale skattefrådraget sitt fullt ut, treng de ikkje berekne noko. Då er det berre å flytte dei kapitalinntektene som kan fordelast fritt til den med lågast pensjon.

Dersom de vil at den av dykk med lågast pensjon skal sleppe å betale skatt, må de finne ut kva beløp de må overføre for at summen av skatt og trygdeavgift hos den med lågast pensjon ikkje går over grensa for restskatt som vi ikkje krev inn. Grensa er 99 kroner (medrekna renter).

Sjå døme på korleis ekteparet Kari og Per fordeler renteinntekter i skattemeldingane sine, og korleis dette gjer at dei får ein lågare samla skatt. 

I døma under har vi brukt skattesatsane for 2024.

Døme som viser at ektefellar kan utnytte ein større del av skattefrådraget ved å flytte kapitalinntekter, men ikkje heile

Kari og Per har tatt ut alderspensjon frå folketrygda med ein pensjonsgrad på 100 prosent heile året, og dei har kapitalinntekt.

	Kari	Per
Pensjon	170 000 kroner	310 000 kroner
Renteinntekt	5 000 kroner	15 000 kroner
Sum	175 000 kroner	325 000 kroner
Berekna skatt	12 795 kroner	51 049 kroner
- Skattefrådrag	12 795 kroner	25 733 kroner
= Skatt	0 kroner	25 316 kroner

 

Bruk gjerne skattekalkulatoren vår for å rekne ut skatt og skattefrådrag.

 

Utrekning av kor stor kapitalinntekt Kari manglar for å kunne utnytte det maksimale skattefrådraget sitt:

Maksimalt skattefrådrag	34 350 kroner
Utnytta skattefrådrag	12 795 kroner
Differansen	21 555 kroner

21 555 kroner i skatt av alminneleg inntekt svarer til ei kapitalinntekt på 21 555 kroner / 22 x 100 = 97 977 kroner. I dette dømet har dei berre 15 000 kroner i kapitalinntekt å flytte frå Per si skattemelding til Kari si skattemelding, så då er det enkelt. Heile beløpet blir flytt.

Dersom ektefellane flytter alle renteinntektene til Kari si skattemelding, blir skatten:

	Kari	Per
Pensjon	170 000 kroner	310 000 kroner
Renteinntekt	20 000 kroner	0 kroner
Sum	190 000 kroner	310 000 kroner
Berekna skatt	16 095 kroner	47 748 kroner
- Skattefrådrag	16 095 kroner	25 733  kroner
= Skatt	0 kroner	22 015 kroner

 

Ektefellane har ikkje så høge kapitalinntekter at Kari får utnytta det maksimale skattefrådraget sitt fullt ut. Ho får framleis 0 kroner i skatt etter skattefrådraget. Per får likevel redusert skatten sin med 3 300 kroner (25 315 kroner – 22 015 kroner). Di lågare den lågaste pensjonen er, di større del av kapitalinntektene lønner det seg å flytte til den ektefellen med lågast inntekt.

Døme som viser at ektefellar kan utnytte ein større del av skattefrådraget ved å flytte kapitalinntekter og kapitalkostnader, men ikkje heile

Kari har tatt ut full alderspensjon frå folketrygda heile året og har kapitalkostnader. Per har tatt ut full alderspensjon frå folketrygda heile året og har kapitalinntekter.

Særskild likning i klasse 1:

Tema	Kari	Per
Pensjon	170 000 kroner	310 000 kroner
Renteinntekt	0 kroner	10 000 kroner
Renter på lån	5 000 kroner	0 kroner
Sum	165 000 kroner	320 000 kroner
Berekna skatt	10 595 kroner	49 948 kroner
- Skattefrådrag	10 595 kroner	25 733 kroner
= Skatt	0 kroner	24 215 kroner

Utrekning av kor stor kapitalinntekt Kari manglar for å kunne utnytte det maksimale skattefrådraget sitt:

Maksimalt skattefrådrag	34 350 kroner
Utnytta skattefrådrag	10 595 kroner
Differansen	23 755 kroner

 

23 755 kroner i skatt av alminneleg inntekt svarer til ei kapitalinntekt på 23 755 kroner / 22 x 100 = 107 977 kroner.

Dersom dei flytter renteinntekta på 10 000 kroner frå Per til Kari og reknar ut skatten på nytt, blir resultatet at ho får utnytta 12 795 kroner av det maksimale skattefrådraget sitt på 34 350 kroner. Per får redusert skatten sin med 2 200 kroner.

Dersom ektefellane flytter rentekostnadene på 5 000 kroner til Per si skattemelding og renteinntektene på 10 000 kroner til Kari si skattemelding blir skatten: 

Tema	Kari	Per
Pensjon	170 000 kroner	310 000 kroner
Renteinntekt	10 000 kroner	0 kroner
Renter på lån	0 kroner	5 000 kroner
Sum	180 000 kroner	305 000 kroner
Berekna skatt	13 895 kroner	46 649 kroner
- Skattefrådrag	13 895 kroner	25 733 kroner
= Skatt	0 kroner	20 916 kroner

 

Kari får utnytta 13 895 kroner av det maksimale skattefrådraget sitt, medan Per får redusert skatten sin med 3 300 kroner. Har de slike kapitalinntekter eller kapitalkostnader, også om dei ikkje er førehandsutfylte i skattemeldinga, kan de fritt velje kven si skattemelding de vil føre desse i.

Bruk gjerne skattekalkulatoren vår for å rekne ut skatt og skattefrådrag.

Meir om korleis ein kan fordele inntekter, kostnader og formue mellom ektefellar, registrerte partnarar og meldepliktige sambuarar