Heimekontor og skatt
Her finn du informasjon om heimekontor, skatt og frådrag når du er tilsett og ikkje jobbar på den vanlege arbeidsstaden din.
Frådraget du får for å ha heimekontor inngår i minstefrådraget som du får automatisk. For dei fleste vil det ikkje vere lønnsamt å krevje frådrag for faktiske kostnader framfor minstefrådraget ein får automatisk. I dei fleste tilfella vil det seie at du ikkje får ekstra frådrag for kostnader knytte til å jobbe heimanfrå.
Utstyr til heimekontoret
Du kan med nokre atterhald få nødvendig utstyr betalt av arbeidsgivaren din utan at dette får følgjer for skatten din.
Eit funksjonelt heimekontor krev at du har både ein arbeidsplass, til dømes skrivebord og stol, og anna nødvendig utstyr tilgjengeleg heime. For visse hjelpemiddel som du treng på heimekontoret, til dømes telefon og internettilgang (EKOM), gjeld eigne skattereglar.
- Arbeidsgivaren din kan både låne deg kontorutstyr og gi deg kontorutstyr, men for at dette skal vere skattefritt, må hovudføremålet vere at du skal bruke utstyret på heimekontoret.
- Du kan også kjøpe utstyret til heimekontoret sjølv og få kostnadene tilbakebetalte av arbeidsgivarenen din. For at det skal vere skattefritt, må hovudføremålet med innkjøpet også her vere at utstyret skal brukast på heimekontoret.
- Dersom arbeidsgivaren din gir deg ein sum pengar som du sjølv disponerer til kjøp av utstyr, vil pengesummen vere skattepliktig som lønn. Unntak: Dersom du dokumenterer for arbeidsgivaren din kva pengane er brukte til, og hovudføremålet med utstyret er at du skal bruke det i arbeidet ditt. Eit eventuelt overskott frå summen du har fått, vil vere skattepliktig som lønn.
- Løpande utgifter til kontorrekvisita som blir forbrukt, og som berre blir forbrukt i jobbsamanheng, kan refunderast utan skatteplikt. Dette kan til dømes gjelde toner til skrivar, kopipapir, skriveblokker, pennar med meir.
Frådrag for heimekontor
Tidlegare vart det fastsett ein standard frådragssats for heimekontor på slutten av inntektsåret. Frå 2024 er denne erstatta med ein sats for utgiftsgodtgjersle. For dei fleste tilsette vil frådraget for kostnader for heimekontor likevel inngå i minstefrådraget. Minstefrådraget får du automatisk.
Du må ha kostnader knytte til arbeidet som er høgare enn minstefrådraget for at det skal lønne seg for deg å krevje frådrag for faktiske kostnader framfor minstefrådraget.
Minstefrådraget for 2024 er på 46 prosent av den brutto lønnsinntekta, men maksimalt 104 450 kroner. Det vil seie at eit eige frådrag for kostnader til heimekontor ikkje er aktuelt for dei fleste.
Sats for trekkfri og skattefri utgiftsgodtgjersle
Dersom du har eit rom i bustaden din som du bruker berre til heimekontor, kan arbeidsgivaren din betale ut ei trekkfri og skattefri hjemmekontorgodtgjersle til deg. Bruker du rommet til noko anna i tillegg til heimekontor, til dømes som stove eller soverom, har du ikkje rett til ei slik skattefri utgiftsgodtgjersle.
Mat på heimekontor
Du får ikkje frådrag for kostnader til mat, til dømes lunsj og overtidsmat, på heimekontor. Dette blir rekna som private utgifter.
Reise til og frå arbeid
Dersom du ikkje lenger reiser like ofte mellom heimen og arbeidsstaden din, får du ikkje frådrag for like mange reiser til og frå arbeid som tidlegare.
Du må sjølv fylle ut i skattemeldinga kor mange dagar du reiste mellom heimen og arbeidsstaden for å sikre at du får rett frådrag. Sjekk også skattekortet, der du kan leggje inn dei faktiske tala som gjeld for deg no.
Frådrag for reisekostnader på yrkesreiser inngår i minstefrådraget.
Sjå prinsippfråsegna frå Skatteetaten for utfyllande informasjon om heimekontor og skatt.