Småjobbar og tenester
Alle inntekter er skattepliktige, men for privatpersonar finst det unntak for visse typar småjobbar.
Gjeld det meg?
Dette gjeld deg som har utført oppdrag og småjobbar, eller hatt ekstrainntekter som privatperson. Det gjeld òg deg som har tent pengar på til dømes fritidsfiske, bærplukking eller sanking av sopp og andre naturprodukt.
Inntekter som kan vera skattefrie
Som privatperson kan du tena inntil ei årleg beløpsgrense for skattefritt sal av hage- og naturprodukt som kan haustast fritt. Aktuelle aktivitetar kan til dømes vera bærplukking, soppsanking eller fritidsfiske.
Viktig informasjon
Beløpsgrenser for skattefritt sal av hage- og naturprodukt som kan haustast fritt:
- til og med inntektsåret 2024: 4 000 kroner
- frå og med inntektsåret 2025: 10 000 kroner
Du kan tena inntil 6 000 kroner på småjobbar og oppdrag i private heimar utan å betala skatt. Det kan til dømes vera tenester som handling, snømoking, plenklipping eller hagearbeid. Tener du meir enn 6 000 kroner må du betala skatt av heile beløpet. Merk at du ikkje kan vera sjølvstendig næringsdrivande innan det same fagfeltet som oppdraget gjeld.
Dersom oppdragsgivaren har meldt inn betalinga du har fått til Skatteetaten, kan det henda at beløpet er førehandsutfylt i skattemeldinga di som skattepliktig inntekt. Då må du sjølv stryka beløpet i skattemeldinga.
Om du utfører mange oppdrag hos ulike oppdragsgjevarar, kan det henda at du skal reknast som næringsdrivande.
Jobbar du for ein frivillig eller velgjerande organisasjon som er skattefri, kan du få inntil 10 000 kroner i skattefri lønn. Tener du over 10 000 kroner, må du betala skatt av heile beløpet.
Får du lønn frå ein frivillig eller velgjerande organisasjon?
I utgangspunktet skal du ikkje betala skatt av hobbyen din, men dersom målet er å tena pengar, kan det henda at hobbyen reknast som næring. Om du er næringsdrivande, er inntekta skattepliktig.
Du må sjølv undersøkja om du er næringsdrivande.
Når du har inntekter frå andre typar småjobbar, må du betala skatt dersom inntektene er større enn utgiftene.
Du kan få lønn frå ei bedrift inntil ei beløpsgrense for skattefri inntekt per år.
Viktig informasjon
Beløpsgrenser for skattefri inntekt per år:
- til og med inntektsåret 2024: 1 000 kroner
- frå og med inntektsåret 2025: 2 000 kroner
Har du inntekter frå småjobbar over tid og går med overskot, må du vurdera om du driv næring.
Dette må du gjera
Har du inntekter frå småjobbar som blir skattepliktige, skal du leggja dei inn under «Lønn og tilsvarande ytingar - Anna arbeidsinntekt” i skattemeldinga.
Har du tent meir enn enn beløpsgrensa for skattefritt sal hage- og naturprodukt, skal du leggja inn inntekta minus beløpsgrensa i skattemeldinga.
Døme
Total inntekt i 2024: 15 000 kr
- Skattefritt beløp i 2024: 4 000 kr
= Beløp du skal føra i skattemeldinga: 11 000 kr
Om du sel fisk frå fritidsfiske direkte til kundar, må du føra denne inntekta i skattemeldinga under “Arbeidsinntekter - Omsetning av fisk”. Om du sel fisken gjennom eit fiskesalslag, rapporterer dei vanlegvis inntekta til Skatteetaten slik at inntekta er førehandsutfylt i skattemeldinga di.