Er eg næringsdrivande?

Med overskott meiner vi at inntektene er høgare enn kostnadene. Dette er det viktigaste du må vurdere. Overskottet må vere rimeleg samanlikna med innsatsen du har lagt ned. Det er ikkje eit krav at aktiviteten må gå med overskott heilt frå starten av, men han må kunne gå med overskott på lengre sikt. Du bør ha haldepunkt som viser at det er sannsynleg at du kan tene pengar på aktiviteten din, til dømes gjennom marknadsundersøkingar, kunnskap eller andre erfaringar. Det er ikkje nok at aktiviteten i seg sjølv gir inntekter viss utgiftene er høgare enn inntektene. Ein hobby eller ein fritidssyssel som du har litt inntekt frå, men som aldri går med overskott, blir ikkje rekna som næringsverksemd. Han gir heller ikkje rett til frådrag for kostnader/underskott.

Kravet om overskott kjem an på kva aktivitet det er snakk om, og må ofte vurderast over fleire år.

Du kan altså gå med underskott, og likevel oppfylle vilkåret om overskott over tid, noko som kan vere særleg aktuelt i ein oppstartsfase. I somme bransjar kan ein heller ikkje sjå resultatet før etter fleire år, til dømes ved juletreproduksjon.

Om ein aktivitet er eigna til å gå med overskott må normalt vurderast med eit perspektiv på fem til åtte år, unntaksvis ti år.

Du kan sjå døme på tilfelle der ein hobby har gått over til å bli næringsverksemd lengre nede på sida.

Det er ikkje eit konkret krav til kor lenge aktiviteten må vare, men det er naturleg å tenkje at du planlegg å halde på med han ei god stund framover.

Når du vurderer dette kriteriet, må du sjå det i samanheng med dei andre kriteria. Til dømes vil det økonomiske resultatet naturleg nok påverke kor lenge du vil halde på med aktiviteten.

Du må utføre aktiviteten regelmessig. Altså er ikkje små enkeltoppdrag og tilfeldige jobbar næringsverksemd. Viss du derimot har mange eller store oppdrag, eller fleire oppdragsgivarar kan det tyde på at du er næringsdrivande. Til dømes vil ikkje eitt enkelt vaskeoppdrag vere næringsverksemd, men gjentakande vaskeoppdrag gjennom året kan vere det. Du treng ikkje sjølv å vere den aktive parten, viss du til dømes har tilsette som utfører arbeidet.

Frilansar

Har du berre enkeltståande oppdrag utan å vere tilsett, bør du vurdere om du er frilansar. Er du frilansar, betaler du skatt på den same måten som lønnsmottakarar, og du leverer skattemeldinga for lønnsmottakarar og pensjonistar.

Les om skilnaden mellom frilansarar og sjølvstendig næringsdrivande (altinn.no)

Passiv kapitalplassering

Dersom aktiviteten er så låg at han må reknast som passiv kapitalplassering, er det ikkje næringsverksemd. Passiv kapitalplassering kan til dømes vere aksjeinvesteringar eller utleige av din eigen bustad.

Les meir om skattereglane ved utleige av bustad

For eiga rekning betyr at det er du sjølv som dekkjer utgiftene ved arbeidet, til dømes utgifter til materiale, og utgifter til anskaffing og drift av utstyr.

For eigen risiko vil seie at det er ditt ansvar at oppdraget blir utført, til dømes at vara eller tenesta blir levert til avtalt tid og pris. Det er du sjølv som ber ansvaret for resultatet av verksemda.

Viss du ikkje stiller med eigne reiskapar, verktøy eller utstyr for å utføre arbeidet, og heller ikkje er ansvarleg for jobben, bør du vurdere om du heller bør reknast som arbeidstakar i staden for sjølvstendig næringsdrivande.