Småkraftverk

Grunnlaget for eigedomsskatten for små kraftverk blir sett ut frå dei samla byggjekostnadene på kraftanlegget. 

Det er frådrag for årlege avskrivingar, både lineære (særskilde driftsmiddel) og for elektroteknisk utrusting (saldogruppe G).

Det er verdien på kraftverket som er grunnlaget for utrekninga av eigedomsskatten. Det er ikkje alle kommunar som har eigedomsskatt. Sjølv om kommunen ikkje har eigedomsskatt, eller skal avvikle han, skal eigedomsskattegrunnlaget likevel rapporterast inn.

Dette gjeld til dømes 

• damanlegg 
• pumpeverk 
• inntaksdam  
• tilløpstunnel og røyrgater (unntatt røyr)  
• kraftstasjonar  
• damhus 

Dette gjeld også fjellhallar, inkludert tilkomsttunnelar og bygningar som har ein direkte funksjon i den løpande kraftproduksjonen.  

Maskinteknisk utstyr montert i kraftanlegget. Til dømes 

• turbinar 
• generatorar 
• røyr 
• foringar i tunnelar 
• luker 
• rister 
• grindreinskar  
• kraner 

Elektroteknisk utrusting i kraftføretak omfattar elektriske anlegg i bygningar som er nødvendige for kraftproduksjonen, som til dømes koplingsanlegg og kablar.  

Dette inkluderer også transformatorar med tilhøyrande anlegg som står attmed kraftstasjonen for å opptransformere frå maskinspenning til overføringsspenning. Faste tekniske installasjonar som gagnar kraftstasjonen og damhuset skal også førast i saldogruppe g. 

Fallrettar og vegar er døme på driftsmiddel i kraftanlegg som normalt ikkje kan avskrivast, men som likevel er med i eigedomsskattegrunnlaget. 

Kraftføretak kan eige driftsmiddel som skal haldast utanfor formuesverdien til kraftanlegget. Desse driftsmidla er dermed ikkje ein del av grunnlaget for eigedomsskatten. 

Til dømes:

• reservedelar, lagerbygg, administrasjonsbygg og tenestebustader 

• linjenett etter opptransformering til overføringsspenning blir ikkje rekna med i grunnlaget for eigedomsskatten, men skal likevel førast i saldogruppe g. 

Påkostingar må aktiverast, og dei skal reknast med i grunnlaget for eigedomsskatten etter frådrag for avskrivingar. Påkostingar på driftsmiddel skal avskrivast med den same satsen og over ein like lang periode som driftsmiddelet. Kva som er ei påkosting må vurderast etter dei vanlege skattereglane. 

Grensa mellom påkosting og vedlikehald 

Vedlikehald, inkludert reparasjon, er arbeid som blir gjort for å få formuesobjektet tilbake til den opphavlege tilstanden sin som ny.  

Påkosting er når arbeidet fører til at formuesobjektet kjem i betre stand, eller i ein annan stand enn det har vore i tidlegare. 

Døme for tilbygg. Er det moderniseringar eller reine endringar?  

Når ei røyrgate skal skiftast ut, og ein skaffar ei røyrgate med større eller betre slukeevne, vil det vere ei påkosting. Arbeid som berre går ut på å endre eit formuesobjekt, blir heller ikkje rekna som vedlikehald. Dette gjeld sjølv om endringa ikkje fører til standardforbetring eller verdiauke. 

Når ein skal avgjere om det har skjedd ei forbetring, må ein ta omsyn til utviklinga som har skjedd innanfor materialbruk og liknande sidan objektet var nytt. Ved til dømes ei påkravd utskifting av eldre delar med nye som etter dagens nivå svarer til same standard, skal heile kostnaden reknast som vedlikehald. Føresetnaden er at den eldre delen trong utskifting. 

Heilskapsvurdering

Du som byggjer, må ta ei heilskapsvurdering der du tar omsyn til ei eventuell standardforbetring av formuesobjektet samla sett.