Tømmerkonto

Det er valfritt å overføre overskott på tømmerkonto.

Viss skogbruksverksemda di går med overskott, kan du sjølv velje om du vil føre overskottet direkte som inntekt i inntektsåret, eller om overskottet i år skal overførast til tømmerkontoen. Du kan også velje om du berre vil føre delar av overskottet. 

Dersom overskottet blir ført på tømmerkonto og tømmerkontoen har positiv saldo, skal minimum 20 prosent av saldoen førast som inntekt. Du kan sjølv velje om du vil inntektsføre meir. 

Inntektsføringa blir registrert som næringsinntekt frå skogbruk i skattemeldinga. 

Viss skogbruksverksemda di går med underskott, må du overføre heile underskottet på tømmerkontoen. 

Har du negativ saldo på tømmerkontoen etter at resultatet i år er lagt til, kan du maksimalt føre 20 prosent som frådrag.  

Frådragsføringa skal registrerast som underskott frå skogbruk i skattemeldinga.

Det er mogleg å ha tømmerkonto utan at det har vore aktivitet i inntektsåret.

Har du positiv saldo på tømmerkontoen, skal minimum 20 prosent av saldoen førast som inntekt. Har du negativ saldo på tømmerkontoen, kan du maksimalt føre 20 prosent til frådrag. 

Er saldoen på tømmerkontoen under 15 000 kroner ved byrjinga av året (30 000 kroner frå inntektsåret 2024), skal heile saldoen førast til inntekt viss han er positiv. Viss saldoen er negativ, kan heile saldoen førast til frådrag.

Du har overskott frå skogverksemda, og ønskjer å føre heile beløpet til tømmerkontoen. Minst 20 prosent av beløpet må takast med som inntekt i skattemeldinga.  

2022 (Tømmerkonto har ikkje vore brukt tidlegare) 

Årets overskott frå skogsdrifta                kr 100 000 

20% blir tatt som inntekt dette året      -  kr   20 000 

Restsaldo per 31.12.2022                       kr   80 000 

Den skattepliktige inntekta frå tømmerkontoen blir då 20 000 kroner. 

Restsaldo per 31.12. blir ståande til det neste neste inntektsåret. Neste inntektsår fører du opp beløpet som saldo 01.01. på tømmerkontoen. Du har underskott i skogbruksverksemda dette året. 

2023 

Saldo tømmerkonto frå 2022                kr 80 000 

- Årets underskot skogsdrifta                kr 50 000 

Grunnlag for berekning                         kr 30 000 

20% blir tatt som inntekt dette året       kr   6 000 

Restsaldo per 31.12. 2023                    kr 24 000 

Den skattepliktige inntekta frå tømmerkontoen blir då 6 000 kroner. 

• Er saldoen på tømmerkontoen positiv, kan du avslutte han med å ta heile restsaldoen til inntekt. 
• Er saldoen på tømmerkontoen negativ, kan han ikkje avsluttast. Du må halde fram med å frådragsføre maksimalt 20 prosent kvart år. 
• Er saldoen på tømmerkontoen under 15 000 kroner ved byrjinga av året (30 000 kroner frå inntektsåret 2024), skal heile saldoen førast til inntekt viss han er positiv. Viss saldoen er negativ, kan heile saldoen førast til frådrag.

Viss du sel skogen eller han blir endra frå næringsskog til kapitalskog, til dømes fordi du har avslutta jordbruksnæringa og skogen åleine ikkje lenger er næringsverksemd, kan du:  

Ved positiv saldo

• avslutte ein positiv saldo på tømmerkontoen med å ta heile restsaldoen til inntekt, eller  
• halde fram med å inntektsføre minimum 20 prosent kvart år. 

Inntekta frå tømmerkontoen vil vere næringsinntekt heilt til kontoen er gjort opp.  

Ved negativ saldo

Er saldoen på tømmerkontoen negativ, må du halde fram med å frådragsføre maksimalt 20 prosent kvart år.  

Ved saldo under 15 000 kroner

Er saldoen på tømmerkontoen under 15 000 kroner ved byrjinga av året (30 000 kroner frå inntektsåret 2024), skal heile saldoen førast til inntekt viss han er positiv. Viss saldoen er negativ, kan heile saldoen førast til frådrag.

Viss du arvar ei skogsverksemd, overtar du også tømmerkontoen. Dette blir kalla skattemessig kontinuitet. 

Dersom skogsverksemda blir avslutta, går inntekter eller frådrag på tømmerkontoen til dødsbuet.  

Ved offentleg skifte av dødsbu skal tømmerkonto som ikkje blir vidareført til arvingane, gjerast opp før skiftet blir avslutta.