Ved kommune- og fylkesdeling vil kommunane få oppretta nye organisasjonsnummer for hovudeiningane for dei nye kommunane.

Ved kommune- og fylkessamanslåing kan kommunen anten

• opprette eit nytt organisasjonsnummer for hovudeininga for den nyoppretta kommunen. Undereiningar frå eksisterande kommunar skal då knytast opp mot det nye organisasjonsnummeret for hovudeininga, eller
• behalde organisasjonsnummeret for hovudeininga og ta over undereiningar til ein eller fleire kommunar som skal opphøyre

Det er laga ein rettleiar til kommunar og fylkeskommunar som endrar struktur. Rettleiinga ligg på Kartverket sine nettsider.

 

Dette må du gjere når ein nyoppretta kommune eller eit fylke får eit nytt organisasjonsnummer

Ved deling eller samanslåing må

1. eksisterande kommunar oppgi sluttdato på arbeidsforholda
2. nyoppretta kommunar oppgi startdato på arbeidsforholda

 

Eksisterande kommunar må oppgi sluttdato

Du avsluttar arbeidsforholda i den gamle kommunen ved å sende a-melding på organisasjonsnummeret til den gamle kommunen og oppgir ein sluttdato for arbeidsforholda. For å unngå feilmeldingar bør sluttdatoen vere siste dato i rapporteringsmånaden. I tillegg må du oppgi ein årsak til sluttdatoen, som ved kommune- eller fylkessamanslåing er endring i organisasjonsstruktur eller internt jobbyte.

Du bør ikkje setje sluttdato for dei eksisterande arbeidsforholda før den nyoppretta kommunen har rapportert arbeidsforholda i a-meldinga.

 

 

Nyoppretta kommunar må oppgi startdato

Du må registrere alle arbeidsforholda i den nye kommunen ved å sende a-melding på det nye organisasjonsnummeret og oppgi startdato for arbeidsforholda. Dette gjer du etter at undereiningane er knytte opp mot den nyoppretta hovudeininga i Einingsregisteret. 

Du bør rapportere arbeidsforholda før den gamle kommunen set sluttdato. Oppgi arbeidsforholda i a-meldinga så tidleg som mogleg, slik at arbeidstakarane ikkje blir ståande utan arbeidsforhold.

Merk!
Ny startdato på arbeidsforholda må vere dagen etter sluttdato for at det skal bli rett i Aa-registeret. Viss til dømes sluttdato er 31. desember, så skal startdato vere 1. januar.

 

 

Dette må du gjere når kommunen beheld organisasjonsnummeret og tar over undereininga i kommunen som opphøyrer

Ved samanslåing må

1. opphøyrde kommunar oppgi sluttdato på arbeidsforholda
2. overtakande kommunar oppgi startdato på dei nye arbeidsforholda

 

Opphøyrde kommunar må oppgi sluttdato på arbeidsforholda

Som opphøyrd kommune må du oppgi ein sluttdato på alle arbeidsforholda. I tillegg må du oppgi ein årsak til sluttdato, som ved kommune eller fylkessamanslåing er endring i organisasjonsstruktur eller internt jobbyte.

 

 

Overtakande kommunar må oppgi startdato på dei nye arbeidsforholda

Som overtakande kommune må du oppgi arbeidsforhold på alle tilsette som du overtar arbeidsgivaransvaret for. For utdjupande informasjon om kva opplysningar du skal oppgi, sjå dei ulike typane arbeidsforhold.

Merk!
Den nye startdatoen på arbeidsforholdet må vere dagen etter sluttdato for at det skal bli riktige opplysningar i Aa-registeret i NAV. Til dømes sluttdato 31. desember og startdato 1. januar.